நட்சத்திரங்கள் நனைந்து போன மழை நாட்கள்

[mubee]

நட்சத்திரங்கள் மழையில்

நனையாது என்று

காலா காலமாய் எழுதப்பட்டுள்ளது

நட்சத்திரங்களுக்கு கீழே

மழை பெய்வதாகவும்

நட்சத்திரங்கள் தொலைவிலுள்ளதாகவும்

கூறப்படுகிறது.

காலத்துள் ஆய்வுகள்

நடக்கின்றன

மழையில் நனைந்த

கற்கள்

கலந்துரையாடுகின்றன

யாரும் நிரூபிக்க முடியாமல்

நட்சத்திரங்கள்

அழகாய் இரவை அலங்கரிக்கின்றன

பகலில் தெரிவதில்லை

சூரியனிடத்திலான ஒப்பந்தங்களால்

மறைக்கப்பட்டுள்ளன

அடை மழையில்

வெள்ளம் ஓடுகிறது

அணைகள் உடைப்புடைந்து

நீர் ஓடுகிறது

அப்போதும்

நட்சத்திரங்கள் அழகாய்

எப்போதும் மின்னுகிறது

மழையில் நனையாது என்று

எல்லாம் சொல்லப்படுகிறது

நட்சத்திரங்களின்

வாழ்வில் உச்சம் முடியும்

போது

அது எரிந்து

பூமியில் விழும்போது

மழையில் நனைவது

நட்சத்திரங்களுக்கும்

சிலருக்கும்

கடைசியில் புரிந்தது